 خابره قلبي ابد ما صك بابه
الكآبه لو تبـي معــنى الكــــآبه؟
ناظر فوجهي ..... وتعرف جَـدّها !!
في وجوه العـــــالم احزان ٍ تشابه
بس في خدِّي ؟؟.. تميـــّـز خدّهــا
حدَّني حظي على المر ّ.. ورضـــى به
بس ابفهم .. هي عليّ وش حـدّها ؟؟
واصـــلة .. وبزعمها..هذي طيابه
ليت تـتـكـــرم عليّ بصدّهــا
خابره قلبـي أبد ما صـــــك بابه
خابرتني طـيّـبه .. مـــا اردّهــا
وإحتراقي: عود .. والدمعة: سحابه
واليمين ْبلا عطا؟ مـــا امدّهـــا
وش بلاها تحسب لهـمِّــي حســـابه
وابتساماتي .... علي ّ تعدّها ؟ !!
والزمن .. حتى الزمن .. زادت عذابه
مابقى به حيل يقوى هـــدّها !!
والفرح سافر و خلى لي غيابــه
ما يبي يجلس .. وهي ما ودّهــا
راح مِتشرّه.. ولا عندي إجــابــه
غير بإني خاتم ٍ في يــــــدّها !؟
وكل ما اتجاهل شقاها بالكتـــابة
هددت سرّي : (تبيِّـــح سدّهـــا) !!
ليمتى بأسكت لها ذوق و ذرابــه؟
كنــــّـها ما قد تعدّت حـــدّها ؟؟
واثر جيشي مختفي قبل انسحابه
واستبـــاحت كــنني من كدّها
لبّــست كل اجنبي ٍ بي .... حجابه
واستــقرت داخـلـي ... من جدّها !؟؟
ومع مرور الوقت بـــأنواع الرتابه
صرت اوقــّف ضد منهو ضدّهـــا !
والكآبه .. تعني الحين (( المهابه))
زادها وجهي شرف .. من قـدّها ؟!!
منقول
التعديل الأخير تم بواسطة سنيد ; 08-18-2011 الساعة 09:52 PM |