هبت جنوب وطاح برد المكاتب .. ويا كثر ما هب الجنوب وذكرته

يملا حضوري في حضوره وأنا غيب.. ويا ما غيابي في غيابه حضرته

إن جاء مطر صارت له ضلوعي شعيب.. وإن راح ريح ٍ طيّر اللي بذرته

جنـّبت لو مالي عن الدمع تجنِيب.. ومن وين ما هاج بجروحي شعرته

طال السكوت ومال صمتي مطاليب.. غير الكلام اللي وقف وإنتظرته

وآآصمتي اللي صار في عيونهم عيب.. وآآجرحي اللي لو فضحني سترته

لي صاحبٍ يملا كفوفه تراحيب.. لولا الحياء في ضحكته ما اعتبرته

ويا صاحبي ما هي عليّه مقاضيب.. عذروبي إنك ذخري اللي ذخرته

عذروبي إنك شــوّهتك الأكاذيب.. عذروبي إنك جاك طيبي ونكرته

إن جيتني بفراق زود العذاريب ..لا جيك أنا من زود صبرٍ صبرته

للطير جنحان وريش ومخاليب.. لكن يضيّع صيدته في غبرته

من جزم نفسي يوم صار الردى طيب.. وحلمي قبل لا يكسرونه كسرته

ومن راح مني قلت يا عله مصيب.. دورت له عذر كريم وعذرته

اللي يبي بعدي أن ماني قريب ..إما ربحني وإلا أنا ما خسرته

قلبي خوي ما لقلبي معازيب.. واللي حقرني من رداه احتقرته

رغم الجروح اللي بقلبي معاطيب.. حييت كفين الزمان وشكرته

__________________